20040313Xisbiga KULMIYE Oo Beeniyey In Cabdi Aw Daahir Iyo Muuse Biixi Ku Biirayaan Weftiga Madaxweyne Rayaale Ee Tegaya Ingiriiska

Xisbiga KULMIYE Oo Beeniyey In Cabdi Aw Daahir Iyo Muuse Biixi Ku Biirayaan Weftiga Madaxweyne Rayaale Ee Tegaya Ingiriiska
Somaliland.Org — Hargeisa, Somaliland — 13 March, 2004
--------------------------------------------------------------------------------

Hargeysa - Xisbiga Mucaaridka ah ee KULMIYE ayaa beeniyey war laga siidaayey Idaacadda Dowladda ee Radio Hargeisa oo sheegayey in laba xubnood oo ka tirsan Guddiga Fulinta ee Xisbiga KULMIYE, Dr. Cabdi Aw Daahir iyo Muj. Muuse Biixi Cabdi oo hadda ku sugan UK ay London kaga biiri doonaan weftiga Madaxweyne Rayaale hoggaaminayo ee ku sii jeeda dalka Ingiriiska.
Afhayeenka Xisbiga KULMIYE Maxamed Kaahin Axmed oo galabta shir jaraa'id ku qabtay xarunta xisbiga ee magaalada Hargeysa ayaa sheegay in wax xidhiidh iyo wadatashi ah aan lagala yeelan xisbiga rrimaha weftiga. Sidaas darteed ayuu yidhi Maxamed Kaahin "Waxaannu ka xunnahay in inagoo marxaladdan oo kale ku jirna oo weftigeenii tegayo dalal dibadeed in warka noocan oo kale ah lagu baahiyo Warbaahinta Qaranka."
Maxamed Kaahin waxa uu sheegay in xataa xubnahaas la magacaabay aan lala xidhiidhin oo aan arrintaas lala soo qaadin, wax ka jiraana aanay jirin.
Hase yeeshee, Waxa uu sheegay in xisbigu taageersan yahay booqashada Madaxweynaha, wuxuuna mar kale ugu baaqay taageerayaasha iyo xubnaha xisbiga ee dibadda jooga inay si weyn uga qaybqaataan soo dhoweynta Madaxweynaha, lana shaqeeyaan.
Waxana uu yidhi isaga oo arrintaas ka hadlaya; "Marka ugu horraysa xisbgia KULMIYE wuxuu soo dhoweynayaa socdaalka Madaxweynaha Somaliland iyo weftigiisu ay ku tegayaan dalka Ingiriiska, isla markaana waxaannu u arkaynaa socdaalkaas oo ah socdaal ahaan kii u horreeyey ee aan dalkaa ku tagno, waana bilow diblomaasiyadeed oo haddii kuwaas kuwo la mid ah aynu helo ama dalal kale oo la mid ah aynu ku tagno noqon karaya kuwo midha dhala".
Waxa uu sheegay in socdaalkani ka dhashay booqashadii weftigii ka socdey Baarlamaanka Ingiriisku dhowaan dalka ku yimi. Waxana uu intaasi ku daray;
"Xisbiga KULMIYE isaga oo tixgelinaya siyaasadda nidaamka dimoqraadiyadda ee furfuran. isagoo tixgelinaya wadatashiga distoorka qaranka lafdhabarta u ah. Isagoo tixgelinaya adkaynta midnimada qaranka, gaar ahaan mararka aynu helo fursadaha sidan oo kale ah. Booqashada Baarlamaanka Ingiriiska lagu tegayo inkastoo ay ku wanaagsanayd in ay u dhammaadaan axsaabta qaranka oo maadaama golaha laynaga casuumay uu yahay gole Baarlamaan oo ay axsaabi fadhido, weftigii inoo yimina uu ka socdey baarlamaan ka wakiil ah saddexda xisbi Qaran ee Ingiriiska - haddana xisbiga KULMIYE isaga oo tixgelin weyn siinaya qaranimada Somaliland iyo ahmiyadda socdaalkani yeelan karo, siduu horeba ugu adkeeyey taageerayaashiisa jaaliyadaha dibadda wuxuu mar labaad farayaa inay si weyn uga qaybqaataan una soo dhoweeyaan Madaxweynaha iyo weftigiisa".
Maxamed Kaahin waxa uu sheegay in sida Madaxweynuhuba sheegay markii uu ka dhoofayey madaarka cidda la casuumay ay tahay xukuumadda wax curshi ahna aanu u arkayn haddii laga reebay axsaabta.
Warka raadiyow Hargeysa ayaan la ogeyn meesha laga soo xigtey. Inkastoo wargeysyada qaarkood ay sheegeen in Marwo Edna Aadan ay sheegtay.
Cabdirisaq M. dubbad, Hargeysa.